Шараға актриса Меруерт Өтекешова, актер Асанәлі Әшімов, сценарист Инна Смайылова және басқалар қатысты.
Жібектің рөлін сомдаған Меруерт Өтекешова деректі фильм түсірілуінің бастамашысы болды. Актриса үшін бұл фильмді болашақ ұрпаққа ерлік, ар-намыс, қадір-қасиет үлгісі. мәдени мұра, сондай-ақ әдемі әрі таза махаббат хикаясы ретінде қалдыру маңызды болды.
Меруерт Өтекешова
Фильм туралы фильм түсіру идеясы оның жұбайы және «Қыз Жібек» фильмінде Төлеген рөлін сомдаған актер Құман Тастанбековке тиесілі еді. Алайда, өкінішке орай, актер 2017 жылы өмірден озды.
«Қыз Жібек» деректі фильмі журналистің зерттеуінен басталады, ол түсірілім процесі туралы ақпарат іздейді: түсірілім тобының алаңда қандай қиындықтарға тап болғанын, оның ішінде қаржылық және цензуралық шектеулерді, шайқас көріністерінің қалай құрылғанын және трюктердің қалай орындалғанын, операторлық жұмыстың ерекшеліктерін және басқаларды біледі.
Асанәлі Әшімов пен Меруерт Өтекешова
«Тарихты ұмытуға болмайды, сондықтан Мемлекеттік ұлттық киноны қолдау орталығының қолдауы мен қаржыландыруы арқасында, барлық қиындықтарға қарамастан, пандемия кезінде де, біз бұл фильмді түсіре алдық.
Фильм кейіпкерлері – актерлер, драматургтер, кинокритиктер, олардың барлық сөздері шын жүректен шыққан. «Қыз Жібек» фильмі өмір сүруін жалғастыруда, ол 50 жылдан кейін де өзектілігін жоғалтпайды. Бұл фильмде қаншама жаңалық бар! Оған қарап, актерлік шеберлікті де, операторлық өнерді де, режиссерлік жұмысты да үйренуге болады», – дейді актриса.
Меруерт Өтекешова қызы Жібекпен
Жібек рөлі актриса Меруерт Өтекешоваға актерлік мамандыққа жол ашуына ықпал етті. Актриса 16 жастағы жас қыз ретінде экран сынақтары, камера, түсіру алаңының не екенін білмей, «Қазақфильм» киностудиясына «Қыз Жібек» рөліне түсуді байқап көргенін айтады.
«Ештеңе білмей, ештеңе істей алмай, «Қазақфильм» киностудиясына сенімді түрде келіп, бірден кастингтен өттім. Интуициям, жан қалауым, ұлы актерлер, режиссерлердің жанында болуым маған бәрін тез сіңіріп алуға көмектесті. Мен ойнаған жоқпын, мен бұл рөлді бір деммен, шын жүректен, жан-тәніммен сүріп шықтым.
Егер жүрек пен жан тыныштығы болмаса актерді актерлік шеберлікке үйрету мүмкін емес деп есептеймін. Сондықтан мен әрқашан жүректе толқудың болуына ерекше мән беремін. Маған қазір 70-тен астым, бірақ жүректегі толқу әрқашан менімен бірге, ал егер ондай толқуды жоғалтсаң, бұл күйге оралу қиын», – деп бөліседі Меруерт Өтекешова.
Анықтама үшін
Екі бөлімді көркем фильм «Қыз Жібек» 1972 жылы экранға шықты. Фильмнің режиссері Сұлтан Қожықов болды.Түсірілім үш жылға созылды.
Бұл – «Қыз Жібек» қазақ эпосы негізінде түсірілген туынды. Фильмде киносценарист Ғабит Мүсірепов, композитор Нұрғиса Тілендиев, кинооператор Асхат Ашрапов, сондай-ақ фильмнің суретшісі және Жібектің анасының рөлін сомдаған Гүлфайрус Ысмайылова жұмыс істеген.
Фильмде рөлдерді Меруерт Өтекешова (Қыз Жібек), Құман Тастанбеков (Төлеген), Асанәлі Әшімов (Бекежан), Кененбай Қожабеков, Мұхтар Бақтыгереев, Әнуар Молдабеков, Фарида Шәріпова, Қанабек Байсеитов сомдады.
Фильм сюжеті бойынша Жағалбайлы руының жас жауынгері Төлеген әкесінің сөзін тыңдамай, көрші рудың батыры Сырлыбайдың қызы Жібекке ғашық болады.
Бірақ олардың сезімдеріне Бекежан кедергі келтіреді. Қарсыластардың шайқасынан кейін Төлеген Бекежанның қолынан қаза табады, ал Жібек суға секіріп, өз-өзіне қол жұмсайды.
