Еске сала кетейік, биыл 16 желтоқсанында Бибігүл Ахметқызы 95 жасқа толды. Ол өмірінің 75 жылын шығармашылық жолына және педагогикалық қызметке арнап, бірнеше буын әртістерді тәрбиелеп шығарды.
Бибігүл Төлегенованың ерекше даусы тек Қазақстанда ғана емес, шетелде де жоғары бағаланған. Ол әлемнің 40 елінде үздік оркестрлердің сүйемелдеуімен, қазіргі заманның әйгілі дирижерлерімен бірге өнер көрсетіп, әлемнің жетекші театрлары мен концерт залдарының сахналарын бағындырды.
Бибігүл Төлегенова өз шығармашылығымен Қазақстан мәдениетіне баға жетпес үлес қосты. Оның өнері жанкүйерлердің жүрегінде және Қазақстаннан тысқары жерде де жаңғырып жатқан мұрағат жазбаларында сақталған.
Концертте Шәмші Қалдаяқовтың, Александр Зацепиннің, Латиф Хамидидің әндері және әйгілі опера арияларынан үзінділері орындалды. Бибігүл Ахметқызының шәкірттерінің бірі Толқын Забирова примадоннаның сүйікті романдарының бірі – «Бұлбұлды» орындады.
Концертті Алматы әкімі эстрадалық-симфониялық оркестрінің дирижері Александр Беляковтың басқаруымен Шәмші Қалдаяқов шығармаларының тақырыбына жазылған увертюра ашты. Виолончелист Бақжан Қазанбай қазақтың халық әні «Япурайды» орындады.
Кеш бағдарламасында «Салтанат» би ансамблі «Шашу» биін тамаша орындап, көрермендерді тәнті етті.
Кештің шарықтау шегі Қазақстан бұлбұлы – Бибігүл Төлегенованың сахнаға шығуы болды. Ол Джузеппе Вердидің «Травиата» операсынан «Застольная» ариясын орындады. Сондай-ақ әнші танымал «Біздің сүйікті дәрігер» фильмінен «Көктем вальсін» шырқады.
Кеш соңында концертке қатысқан барлық әртістер сахнаға шығып, бірге музыкалық нөмір орындады.
Шығармашылық кеш аяқталғаннан кейін салтанатты қабылдауда қазақстандық әнші Димаш Құдайберген Бибігүл Ахметқызына сыйлық ретінде әдемі алтын білезік тарту етті. Өз сөзінде Димаш аңызға айналған әншіге деген терең құрметі мен таңданысын білдіріп, оны «болашақ музыкант ұрпақтар үшін нағыз үлгі» деп атады.
